୩୪୯ ଟି ନୂଆ ଆମ୍ବୁଲାନ୍ସକୁ ଲୋକାର୍ପଣ କଲେ ମୁଖ୍ୟମନ୍ତ୍ରୀ

ଉନ୍ନତ ରୋଗୀ ସେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୩୪୯ ଆମ୍ବୁଲାନ୍ସ ରାଜ୍ୟବାସୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି।

କଳିଙ୍ଗ ଷ୍ଟାଡିୟମରେ ନବୀନ ଏହି ଆମ୍ବୁଲାନ୍ସକୁ ପତାକା ଦେଖାଇ ଶୁଭାରମ୍ଭ କରିଥିଲେ। ୩୪୯ ଆମ୍ବୁଲାନ୍ସ ମଧ୍ୟରୁ ୨୭୯ଟି ୧୦୮ଟି ଜରୁରୀକାଳୀନ ଆମ୍ବୁଲାନ୍ସ ସେବା ଅଧୀନରେ ପରିଚାଳିତ ହେବ ଏବଂ ବାକି ୭୦ଟି ମେଡିକାଲ କଲେଜ ଓ ହସ୍ପିଟାଲ ଏବଂ ଜିଲ୍ଲା ମୁଖ୍ୟ ଚିକିତ୍ସାଳୟ (ଡିଏଚଏଚ)ରେ ନିୟୋଜିତ ହୋଇ ଜରୁରୀକାଳୀନ ରୋଗୀପରିବହନ ସୁବିଧା କରିବ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ ପ୍ରେସ୍ ବିବୃତିରେ କୁହାଯାଇଛି।

ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (ବିଏସକେୱାଇ) ରୋଗୀଙ୍କୁ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରିବା ପାଇଁ ମେଡିକାଲ କଲେଜ ଓ ଜିଲ୍ଲା ଡାକ୍ତରଖାନାରେ ଏହି ୭୦ଟି ଆମ୍ବୁଲାନ୍ସ ନିୟୋଜିତ କରାଯିବ। ସେଥିମଧ୍ୟରୁ ୩୦ଟି ଆଡଭାନ୍ସ ଲାଇଫ ସପୋର୍ଟ (ଏଏଲଏସ) ଓ ୪୦ଟି ବେସିକ୍ ଲାଇଫ୍ ସପୋର୍ଟ (ବିଏଲଏସ) ଆମ୍ବୁଲାନ୍ସ ରହିଛି।

ରାଜ୍ୟରେ ନୂଆ ଆମ୍ବୁଲାନ୍ସ ଆରମ୍ଭ ପାଇଁ ସରକାର ୧୪୮.୪୫ କୋଟି ଟଙ୍କା ଖର୍ଚ୍ଚ କରିଛନ୍ତି।

ନୂଆ ଆମ୍ବୁଲାନ୍ସ କୁ ମିଶାଇ ରାଜ୍ୟରେ ମୋଟ ୧୦୮ ଆମ୍ବୁଲାନ୍ସ ସଂଖ୍ୟା ୧୩୬୬କୁ ବୃଦ୍ଧି ପାଇଛି। ବର୍ତ୍ତମାନ ରାଜ୍ୟରେ ଦୈନିକ ୪ ହଜାରରୁ ଅଧିକ ରୋଗୀଙ୍କୁ ୧୦୮ ଆମ୍ବୁଲାନ୍ସ ସେବା ଯୋଗାଇ ଦିଆଯାଉଛି। ତେଣୁ ନୂଆ ଆମ୍ବୁଲାନ୍ସ ଅନ୍ତର୍ଭୁକ୍ତ ହେଲେ ଜରୁରୀକାଳୀନ ରୋଗୀ ପରିବହନର ବ୍ୟାପକତା ଆହୁରି ବୃଦ୍ଧି ପାଇବ।

ଅନ୍ୟ ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଭୁବନେଶ୍ୱରସ୍ଥିତ ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ଏଜୁକେସନ ଆଣ୍ଡ ରିସର୍ଚ୍ଚ ଆଣ୍ଡ କ୍ୟାପିଟାଲ ହସ୍ପିଟାଲରେ ମଡ୍ୟୁଲାର ଅପରେସନ ଥିଏଟର କମ୍ପ୍ଲେକ୍ସକୁ ଲୋକାର୍ପଣ କରିଥିଲେ।

ମଡ୍ୟୁଲାର ଓଟି କମ୍ପ୍ଲେକ୍ସକୁ ଲୋକାର୍ପଣ କରି ଶ୍ରୀ ପଟ୍ଟନାୟକ କହିଛନ୍ତି ଯେ ଏହି ଅତ୍ୟାଧୁନିକ ସୁବିଧା ଗୁରୁତର ଅବସ୍ଥାରେ ରୋଗୀଙ୍କ ଚିକିତ୍ସା ଦିଗରେ ଏକ ବଡ଼ ପଦକ୍ଷେପ।

୧୬.୭୬ କୋଟି ଟଙ୍କା ବ୍ୟୟରେ ଓଟି କମ୍ପ୍ଲେକ୍ସ ନିର୍ମାଣ କରାଯାଇଛି ଏବଂ ଏହି କମ୍ପ୍ଲେକ୍ସରେ ୪ଟି ଅପରେସନ ଥିଏଟର ରହିଛି ଯାହା ଏକାସାଙ୍ଗରେ ୮ଟି ଅପରେସନକୁ କରାଯାଇ ପାରିବ ।